Bakı, 4 mart, AZƏRTAC
Martın 4-də Azərbaycan Dillər Universitetində (ADU) bu ali məktəbin qadınlar şurasının təşkilatçılığı ilə “Qadınların ictimai, iqtisadi və sosial sahələrdə hüquqlarının qorunması” mövzusunda konfrans keçirilib.
ADU-dan AZƏRTAC-a bildirilib ki, konfransda linqvokulturologiya kafedrasının müdiri, qadınlar şurasının sədri, professor Məsməxanım Qazıyeva respublikamızın ictimai-siyasi, mədəni həyatında fəal iştirak edən, nəcib əməlləri ilə xalqımızın tərəqqisinə çalışan qadınların çox olduğunu söyləyib. M.Qazıyeva Azərbaycan qadınlarının tarix boyu milli dövlətçiliyin təşəkkülündə, möhkəmlənməsində və idarə olunmasında böyük rolunu qeyd edib.
Konfransda “Qadınların ictimai, iqtisadi və sosial sahədə hüquqlarının qorunması dövlətin ümumi inkişaf strategiyasının prioritet sahələrindəndir”, “Azərbaycan qadınlarının dövlət qurumlarında rolu” və “Azərbaycan qadınlarının idmanda, qeyri-hökumət təşkilatlarında lider kimi rolu. Azərbaycanın rektor qadınları” mövzusunda məruzələr dinlənilib.
Digər çıxış edənlər də ADU-da qadınların yüksək vəzifələri icra etmələri, elm, siyasət və digər sahələrdə onların xüsusi rollarının olması, beynəlxalq hüquqları və digər məsələlər barədə fikirlərini bölüşüb, konfransda iştirak edən qadınları 8 mart - Beynəlxalq Qadınlar Günü münasibətilə təbrik ediblər.
Konfrans müzakirələrlə başa çatıb.