Çində alimlər suda boğulma təhlükəsi ilə üzləşən insanlara ən qısa zamanda yardım göstərmək üçün innovativ suüstü xilasedici robot hazırlayıblar.
Metbuat.az xəbər verir ki, “QuadBoat” adlandırılan bu texnologiyanın əsas məqsədi peşəkar xilasedicilər hadisə yerinə çatana qədər zərərçəkənə operativ dəstək vermək və mümkün qədər çox insanın həyatını xilas etməkdir.
Layihə Şençjen Süni İntellekt və Robototexnika İnstitutu (AIRS), Çin Honq Konq Universitetinin (Şençjen) və ABŞ-nin Stivens Texnologiya İnstitutunun tədqiqatçılarının birgə əməkdaşlığı nəticəsində hazırlanıb. Robotun dizaynı suyun səthində rahat hərəkət edə bilən ovçu hörümçəklərdən ilhamlanaraq yaradılıb.
Xüsusi kameralar və süni intellekt əsaslı görüntü emalı sistemi ilə təchiz edilən “QuadBoat” suda köməksiz vəziyyətdə qalan şəxsi avtomatik müəyyənləşdirir, onun koordinatlarını hesablayır və ən qısa marşrutla hadisə yerinə yönəlir. Bu xüsusiyyət robotun xilasetmə əməliyyatlarına ilk dəqiqələrdən dəstək verməsinə imkan yaradır.
Robot dörd ayağının ucunda yerləşən xüsusi üzən platformalar sayəsində suyun səthində sabitliyini qoruyur. Hər bir ayağın müstəqil idarə olunması ona irəli, geri və yan istiqamətlərdə yüksək manevr qabiliyyəti qazandırır. Eyni zamanda, robot öz oxu ətrafında sürətlə fırlanaraq istiqamətini ani şəkildə dəyişə bilir ki, bu da fövqəladə hallarda çevik reaksiya verməsini təmin edir.
İlkin sınaqlar hovuzlarda və nəzarət olunan açıq su hövzələrində uğurla başa çatıb. Tədqiqatçılar növbəti mərhələdə "QuadBoat"u güclü dalğalar, sərt su axınları və əlverişsiz hava şəraiti kimi çətin dəniz mühitində sınaqdan keçirməyi planlaşdırırlar.
Mütəxəssislər hesab edirlər ki, sınaqlar uğurla yekunlaşarsa, “QuadBoat” yaxın illərdə çimərliklərdə, su istirahət mərkəzlərində və sahil mühafizə xidmətlərində xilasedicilərin ən etibarlı texnoloji köməkçilərindən birinə çevriləcək.
