Gündə nə qədər çiyələk yemək olar?

Çiyələk həm dadı, həm də tərkibi ilə sağlamlığa bir çox fayda verən giləmeyvələrdən biridir. Tərkibində yüksək miqdarda C vitamini, antioksidantlar, lif və müxtəlif faydalı bitki birləşmələri mövcuddur.

Metbuat.az xəbər verir ki, bu maddələr orqanizmin ümumi sağlamlığını dəstəkləyir və gündəlik qidalanmada mühüm rol oynayır.

Mütəxəssislərin məlumatına görə, çiyələk immun sisteminin güclənməsinə kömək edir, orqanizmi infeksiyalara qarşı daha dayanıqlı edir. Eyni zamanda, tərkibindəki antioksidantlar ürək-damar sağlamlığını dəstəkləyə, qan dövranının yaxşılaşmasına müsbət təsir göstərə bilər. Liflə zəngin olması isə həzm sisteminin düzgün işləməsinə yardım edir və bağırsaq fəaliyyətini tənzimləyir. Bundan başqa, çiyələk dərinin daha sağlam və parlaq görünməsinə də dəstək ola bilər.

Qidalanma mütəxəssisləri gündəlik istehlak üçün orta porsiyanın kifayət etdiyini bildirirlər. Sağlam insanlar üçün gündə təxminən 150–200 qram, yəni bir stəkan çiyələk yemək ideal sayılır. Bu miqdar orqanizmə lazım olan faydalı maddələri təmin edir, eyni zamanda artıq şəkər və turşuluq qəbulunun qarşısını alır.

Bununla yanaşı, həssas mədəsi olan şəxslərin çiyələyi çox miqdarda qəbul etməsi məsləhət görülmür. Şəkərli diabet və ya allergiyası olan insanlar isə istehlakı həkim məsləhətinə uyğun tənzimləməlidirlər.