Moda dizayneri Kamilla Məmmədzadə "Yes Couture"brendi ilə birlikdə Azərbaycan xalçalarından ilhamlanan kolleksiyasını təqdim etdi –

Bu günlərdə Azərbaycan Milli Xalça Muzeyində moda dünyası milli mədəniyyətimizin əsas simvollarından biri ilə qovuşub.

Metbuat.az xəbər verir ki, "Zamanın naxışları" adlı fashion show-da Azərbaycan dizaynerləri muzey fondlarındakı xalça ornamentlərindən ilhamlanan kolleksiyalarını nümayiş etdiriblər.

Görkəmli sənətkar Lətif Kərimovun 120 illiyinə həsr olunan bu layihə Azərbaycan xalçaçılıq ənənələri ilə müasir modanı özündə birləşdirib. Tədbirin xüsusi qonaqları arasında Alyona Əliyeva yer almışdır.

Nümayişdə xüsusi yeri Yeganə Sadıxovanın rəhbərlik etdiyi "Yes Couture" moda evi ilə birgə yaradılan, gənc Azərbaycan dizayneri Kamilla Məmmədzadənin debüt kolleksiyası tutub. Müxtəlif dizayner nəsillərini Azərbaycan xalçasına və onun ornamentlərinə olan ortaq sevgi ətrafında birləşdirən layihə əsl varislik hekayəsinə çevrilib.

Təqdim olunan kolleksiya Azərbaycan xalça sənətinin müasir tərzdə oxunuşunun parlaq nümunəsi olub. Ənənəvi motivlərin ornamentləri, rəng harmoniyası və plastikası mədəni köklərlə əlaqəni qoruyaraq müasir siluetlərə üzvi şəkildə inteqrasiya edilib. Kolleksiya sübut etdi ki, xalçaçılıq irsimiz müasir dizayn dilində həm tanınan, həm də aktual olaraq təbii şəkildə yaşaya bilər.

K. Məmmədzadənin sözlərinə görə, modaya olan sevgisi hələ uşaqlıq illərində onu tez-tez "Yes Couture" moda evinə aparan anası sayəsində yaranıb. Yeganə Sadıxovanın iş prosesini izləyərkən o, bir gün öz şəxsi kolleksiyasını yaratmağın xəyalını qurub.

Zamanla bu həvəs şüurlu peşə seçiminə çevrilib və üç il öncə Kamilla Məmmədzadə "Simoorg Fashion & Design Academy"yə qəbul olub. Dizayner bildirir: "Hədiyyə xanımın rəhbərliyi altında mən moda dizaynının əsaslarını – eskizlərin yaradılması və kolleksiyaların hazırlanmasından tutmuş, rəng, parça və geyim detalları ilə işləməyə qədər hər şeyi öyrəndim. Hər bir dərs bu peşədə inkişaf etmək istəyimi daha da gücləndirirdi".

Kamilla Məmmədzadə vurğulayıb ki, ən böyük peşəkar qürurlarından biri məhz öz eskizlərinin podiumda nümayiş olunan kolleksiyalarda real həyat tapmasıdır. Onun sözlərinə görə, o, öz işlərində milli ənənələri, zərifliyi və müasir moda tendensiyalarını vəhdət şəklində təqdim etməyə çalışır.

Kamilla Məmmədzadə əmindir ki, moda dünyagörüşünü, mədəniyyəti və fərdiliyi ifadə etmək üçün bir vasitədir. Gənc dizayner gələcəkdə Azərbaycan modasını beynəlxalq arenada layiqincə təmsil etməyi hədəflədiyini qeyd edib.

Qeyd edək ki, Kamilla Məmmədzadənın səsi dəfələrlə gənc dizayner kimi Avropa duyulmuşdur. Belə ki, ötən il İtalyanın Neapol şəhərində, 13-14 noyabr tarixində baş tutmuş beynəlxalq Miss Europa müsabiqəsində, özəl olaraq qalib iştirakçıların səhnə geyimlərinin dizayneri olmuşdur. Bu il 18 may tarixində Fransanın Kann şəhərində 79-cu Film Festival zamanı ilin uğurlu gənc dizayneri ödülü ilə mükafatlandırılmışdır.