Gənclər dünya biznesinin və yerli bazarın nümayəndələrinin təcrübələrini öyrənəcəklər

Bakı, 6 mart,

AZƏRTAC

Matın 14-də AİESEC-in təşkilatçılığı ilə Bakıda “Start-upFest” adlı tədbir keçiriləcək.

AZƏRTAC

xəbər verir ki, “Start-upFest” dünyanın müxtəlif yerlərindən olan müvəffəqiyyət qazanmış AİESEC məzunları və yerli iş adamlarının iştirakı ilə keçirilən tədbirdir.

Məqsəd Azərbaycan gənclərini, dünya biznesi və yerli bazarın nümayəndələrini bir araya gətirməklə, təcrübə mübadiləsi aparmaq, eləcə də gəncləri yeni iş ideyalarına təşviq etmək, gənc sahibkarlar və sahibkarlıqla maraqlanan tələbələr üçün yeni imkanlar yaratmaqdır.

Qeyd edək ki, AIESEC gənclərin liderlik potensialını tapmaq və inkişaf etdirmək imkanı yaradan təşkilatdır. 124 ölkədə 1 milyondan çox üzvü olan AIESEC dünyanın ən böyük gənclər təşkilatıdır.