Bakıda homoseksualın qətli ilə bağlı rəsmi açıqlama

Bakı şəhər Baş Polis idarəsi və şəhər prokurorluğu bir neçə gün əvvəl Nərimanov rayonu ərazisində törədilən qətllə bağlı birgə məlumat yayıb. Bakı Şəhər Prokurorluğundan Milli.Az-a daxil olan məlumatda deyilir ki, Nərimanov rayon hüquq mühafizə orqanlarının birgə həyata keçirdiyi təxirəsalınmaz istintaq-əməliyyat tədbirləri nəticəsində qeyri-aşkar şəraitdə törədilmiş qətl hadisəsinin açılması təmin edilib.

Fevralın 28-də saat 23 radələrində rayonun A.Heydərov küçəsi, ev 2, mənzil 16-da kirayədə yaşamış

Əliyev Bəxtiyar Mayıl oğlu

nun bədəni üzərində zorakılıq əlamətləri olan meyitinin aşkar edilməsi faktına görə Nərimanov rayon Prokurorluğunda Cinayət Məcəlləsinin 120.1-ci (qəsdən adam ödürmə) maddəsi ilə cinayət işi başlanıb.

Həyata keçirilmiş istintaq və əməliyyat-axtarış tədbirləri nəticəsində həmin cinayətin Kürdəmir rayon sakini,

Məlikov Nicat Əliheydar oğlu

tərəfindən törədilməsində əsaslı şübhələr yarandığından o, tutularaq istintaqa cəlb olunub. N.Məlkov həyata keçirilmiş istintaq hərəkətləri, o cümlədən ifadəsinin yerində yoxlanılması zamanı cinayət barəsində etirafedici ifadələr verməklə, qətl hadisəsindən sonra B.Əliyevin yaşadığı mənzildən oğurladığı mərhuma məxsus mobil telefon, kompüter və digər əşyaları istintaq orqanına təqdim edib və həmin əşyalar maddi sübut kimi cinayət işinin materiallarına əlavə edilib. Hazırda cinayət işi üzrə istintaq-əməliyyat tədbirləri davam etdirilir.

Onu da əlavə edək ki, mətbuatda yayılmış məlumatda mərhumun homoseksual olması vurğulanırdı.

Milli.Az