Azərbaycanda müəllim vəfat etdi

Naxçıvan Dövlət Universitetinin “İqtisadiyyat və marketinq” kafedrasının müəllimi Elşən Nəsirov vəfat edib.

Metbuat.az xəbər verir ki, bu barədə universitet məlumat yayıb.

Nəsirov Elşən Nurəddin oğlu 29 sentyabr 1964-cü ildə Naxçıvan şəhərində anadan olub. Orta təhsilini Bakı şəhərində alıb, 1979-cu ildə Bakı Politexnik Texnikumuna qəbul olub və 1983-cü ildə həmin təhsil müəssisəsini bitirib.

Elşən Nəsirov əmək fəaliyyətinə 1983-cü ildə Bakı şəhərində texnik vəzifəsində başlayıb. Sonrakı illərdə müxtəlif müəssisə və təşkilatlarda iqtisadiyyat, idarəetmə və rəhbər vəzifələrdə çalışıb, zəngin peşəkar təcrübə qazanıb.

2000–2002-ci illərdə Naxçıvan Özəl Universitetinin Humanitar Elmlər kafedrasında müəllim, 2002–2011-ci illərdə Naxçıvan şəhərində “İdeal” firmasının direktoru vəzifəsində çalışıb. Sonrakı illərdə də müxtəlif müəssisələrdə rəhbər və mütəxəssis kimi fəaliyyətini davam etdirib.

2020-ci ildən Naxçıvan Dövlət Universitetinin “İqtisadiyyat və marketinq” kafedrasında müəllim kimi çalışıb, bilik və təcrübəsinin gənc nəslə ötürülməsinə öz töhfəsini verib.