Avqustda bu məhsullar bahalaşa bilər -

Yay mövsümünün son ayı olan avqustda istehlak bazarında ənənəvi qiymət dəyişiklikləri müşahidə olunur. Mövsümi amillər, artan tələbat və bəzi sahələrdə xərclərin yüksəlməsi bir sıra məhsul və xidmətlərin bahalaşmasına səbəb olur. Xüsusilə təhsil, ərzaq və kirayə mənzil bazarında qiymət artımı ehtimalı daha yüksək qiymətləndirilir.

Metbuat.az xəbər verir ki, yeni tədris ilinin yaxınlaşması ilə məktəb ləvazimatlarına tələbat əhəmiyyətli dərəcədə artır. Məktəb formaları, çantalar, dəftərlər, qələmlər və digər dəftərxana məhsullarına marağın yüksəlməsi qiymətlərə də təsir göstərir. Satıcılar bu dövrdə artan tələbat fonunda qiymətlərə yenidən baxırlar. Tələbatın artması bəzi işbazlar üçün əla fürsət sayılır.

Avqustun ikinci yarısından etibarən bazara çıxarılan bəzi mövsümi meyvə və tərəvəzlərin həcmi azalır. İsti hava şəraiti, suvarma və daşınma xərclərinin artması, eləcə də məhsulun saxlanması ilə bağlı əlavə xərclər bu məhsulların qiymətinin yüksəlməsinə gətirib çıxarır. Xüsusilə tez xarab olan kənd təsərrüfatı məhsullarında bu tendensiya daha aydın hiss olunur.

Bu dövrdə kirayə mənzil bazarında da ənənəvi canlanma yaşanır. Yeni tədris ili və iş mövsümü ərəfəsində tələbələrin, eləcə də müxtəlif bölgələrdən iri şəhərlərə köç edən insanların sayının artması kirayə mənzillərə tələbatı yüksəldir. Nəticədə xüsusilə Bakı və digər böyük şəhərlərdə kirayə qiymətlərində artım müşahidə olunur. Eyni tendensiyanın bu il də davam edəcəyi gözlənilir.

Qiymətlərə təsir edən digər amillərdən biri də nəqliyyat və logistika xərcləridir. Daşınma tariflərinin yüksəlməsi, həmçinin dünya bazarlarında bəzi idxal məhsullarının bahalaşması yerli bazarda da özünü göstərir. Eyni zamanda heyvan yemi və istehsal xərclərinin artması ət və süd məhsullarının qiymətlərinə də təsirsiz ötüşmür.

Mütəxəssislər hesab edirlər ki, avqust ayında ailə büdcəsini daha diqqətlə planlaşdırmaq məqsədəuyğundur. Xüsusilə məktəb ləvazimatları və uzun müddət saxlanılması mümkün olan bəzi məhsulların əvvəlcədən alınması sonradan yarana biləcək əlavə xərclərin qarşısını almağa kömək edə bilər.