Sosial

Vaxtı keçmiş məhsullar aşkarlandı

Metbuat.az 15 aprel 2015, 20:05

Saxlama müddəti ötmüş ərzaq məhsullarının insan orqanizminə zərəri böyükdür. Müvafiq dövlət strukturları tərəfindən vaxtaşırı keyfiyyətsiz ərzaq məhsullarının sıradan çıxarılması üçün addımlar atılsa da, hələ də məsələni tam həll etmək mümkün olmayıb. Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin keçirdiyi növbəti monitorinq zamanı bir sıra mağazalarda bu cür neqativ hallar aşkar edilib.

Kanal S (Region TV) xəbər verir ki, istifadə müddəti bitmiş ərzaq və qeyri ərzaq məhsullarının satılması qadağan olunsa da, dükan və marketlərdə bu cür mallara tez-tez rast gəlmək olur. Saxlama müddəti keçmiş ərzaq məhsullarını satanlar onu istehsalçıya qaytarmayaraq, istehlakçılara təklif edirlər. Alıcılar isə çox vaxt məhsulların görünüşünə nəzər yetirərək onun istifadə müddəti və üstündəki normativ sənədlərə baxmırlar.

Əslində, ərzaq məhsullarının istifadə tarixinə alıcılarla yanaşı, satıcılar özləri də diqqət yetirməlidirlər. Çünki qanunvericiliyə görə, onlar satdıqları məhsulun keyfiyyətinə görə məsuliyyət daşıyırlar.

Ancaq mağaza sahiblərinin heç də hamısı bu məsuliyyəti dərk etmir. Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin keçirdiyi son monitorinqlər də bunu sübut edir. Belə ki, yoxlamalar zamanı Şəkidə Mustafa Məmmədova məxsus,

Şamaxıda Asim Nərimanova məxsus, Balakəndə isə Laləzər Səfərovaya məxsus mağazalarda saxlama müddəti ötmüş malların satıldığı məlum olub. Qanun pozuntusuna yol vermiş şəxslər barəsində Azərbaycan Respublikasının İnzibati Xətalar Məcəlləsinə uyğun olaraq inzibati cərimələr tətbiq olunacaq. Onları 1500 manatdan 5000 manatadək cərimə gözləyir. Sakinlər isə istifadə müddəti ötmüş, keyfiyyətsiz malların satış ilə rastlaşdıqda, 498-15-01 və 498-15-04 nömrəli telefonlarla Antiinhisar Siyasəti və İstehlakçıların Hüquqlarının Müdafiəsi Dövlət Xidməti və İqtisadiyyat və Sənaye Nazirliyinin 195-2 Telefon Məlumat Mərkəzinə məlumat verə bilərlər.

Milli.Az

Vaxtı keçmiş məhsullar aşkarlandı

Oxşar xəbərlər