Gecə məktəbləri niyə aktuallığını itirib? (VİDEO)
Elm, savada yiyələnmək də bəziləri üçün problemə çevrilib. Ailənin sosial durumunun ağırlığını öz kiçik çiyinlərinə alaraq təhsildən uzaqlaşanlar olur. İşləyərək valideynlərinə dayaq durmağa çalışırlar. Düzdür bu amil bütün dövrlərdə müşahidə olunub. Amma çox da uzaq olmayan ötən əsrin 60-90-ci illərdə işləmək məcburiyyətində qalan yeniyetmələr. Hətta vaxtilə yeniyetmə olmuş, amma artıq gənc yaşını yaşayanlar təhsillərini davam etdirmək üçün gecə məktəblərinə üz tuturdular. Beləcə ötürdükləri təhsil anlarını qabaqlayaraq bilik savadlarını artırırdılar. Hətta zaman-zaman yeni işə yiyələnmələrini də eşitmək olurdu. Düzü son vaxtlar bu haqda heç nə eşitmirik. Hətta bir çoxları məlumatsızdır ki, bu tip məktəblər Azərbaycanda var, ya yox. Sən demə var.
Elm işıq, elmsizlik isə zülmətddir deyiblər. Elə yaxın keçmişimizə nəzər salsaq görərik ki, sovetlər dönəmində nəinki məktəblilər, hətta gənclər və orta yaşlı nəslin nüməyəndələri də bilik, savad əldə etməkdən çəkinmirdi. Əksinə buna doğru addımlayırdı. Bunun üçün hətta dövlət tərəfindən təhsil ocaqlarında, fəhlə-gənclər məktəbi kimi tanınan gecə məktəbləri də fəaliyyət göstərirdi. Burada istənilən yaşda olan insanlara rast gəlmək mümkün idi. Əsas məqsəd gündüz vaxtlarında müxtəlif səbəblərdən oxumağa imkanı olmayan vətəndaşları biliyə, savada yiyələndirmək idi. Amma Sovetlər Birliyi dağıldıqdan sonra, bu təhsil sistemi də yavaş-yavaş sıradan çıxaraq yox oldu. Bu təhsil formasının ləğv olunmasında müxtəlif səbəblər sadalansa da, mütəxəssislərin fikrincə, bunun baş verməsi, təhsildə digər formaların meydana gəlməsilə bağlı oldu.
Ekspert Əjdər Ağayevin sözlərinə görə, bu formanın itməsində texnikanın inkişafı da müəyyən rol oynayır: "Bu gün texnologiya çox inkişaf edib. İnternetdən istifadə etməklə, planları və proqramları yerinə yetirməklə imtahan vermək mümkündürsə, o zaman müəyyən məbləğ qarşısında axşam oxumağın nə əhəmiyyəti var. Düşünürəm ki, bu gün buna ehtiyac yoxdur”.
Ölkə ərazisində fəaliyyət göstərən ümumtəhsil məktəblərində bu cür təhsil sisteminin olub-olmamasını öyrənmək üçün, Təhsil Nazirliyinin Bakı şəhəri üzrə təhsil idrəsinə müraciət etdik. Qurumdan bildirdilər ki, hazırda Bakı şəhəri üzrə təhsil idarəsinin tabeliyində, 6 ümumitəhsil məktəbi var. Bu təhsil ocaqlarının tərkibində qiyabi məktəblər fəliyyət göstərir. Burada onlar həftədə üç dəfə dərsə gəlir və ümumilikdə 4 il oxuyurlar.
İdarənin ictimaiyyətlə əlaqələr şöbəsinin müdiri Arzu Tairquliyeva bildirdi ki, qiyabi qrupların tədris materialları, orta məktəb materilları ilə eynilik təşkil edir: "Lakin proqram nisbətən fərqlənir. Belə ki, onlar 12-ci siniflər üzrə təhsil alırlar. Buna görə də, materialların tədrisi, metodu və zamanı bölünməsi bir qədər fərqlənir”.
Qurumdan verilən məlumata görə, hazırda 6 ümumtəhsil məktəbində müxtəlif yaş kateqoriyasına aid olan 1300-ə yaxın şagird təhsil alır. Bu şagirdlər də sonda kamal attestatı alırlar. Bu sənəd isə hazırkı11 illik attestatla eyni hüquqi qüvvəyə malikdir.
ANS TV