Trampın çıxışında Çinə dair kəşfiyyat məlumatları açıqlana bilər -

ABŞ Prezidenti Donald Tramp bu gün ölkədə seçki təhlükəsizliyi mövzusunda televiziya ilə yayımlanacaq çıxış etməyə hazırlaşır.

Metbuat.az xəbər verir ki, Ağ Ev Trampın çıxışı zamanı Çinin 2020-ci il ABŞ prezident seçkilərinə mümkün müdaxiləsi ilə bağlı məxfi kəşfiyyat məlumatlarının açıqlanıb-açıqlanmayacağını müzakirə edir.

Məlumata əsasən, bəzi administrasiya rəsmiləri belə məlumatların ictimaiyyətə təqdim edilməsinin yanlış təəssürat yarada biləcəyindən narahatdır.

Tramp uzun illərdir ABŞ-da seçki sistemini tənqid edir və 2020-ci il prezident seçkilərinin saxtalaşdırıldığını iddia edir. O, həmçinin poçt vasitəsilə səsvermədə geniş saxtakarlıqların baş verdiyini, səsvermə maşınlarının etibarsız olduğunu və qeyri-vətəndaşların səs verdiyini dəfələrlə bəyan edib.

Lakin ABŞ məhkəmələri və aparılan təkrar səslərin sayılması prosesləri 2020-ci il seçkilərində genişmiqyaslı saxtakarlığa dair hər hansı sübut aşkar etməyib.

"Reuters"in mənbələrinin bildirdiyinə görə, Trampın ilk prezidentlik dövründə (2017–2021) toplanmış kəşfiyyat məlumatlarında Çinin seçki nəticələrini dəyişdirdiyi və ya səslərə müdaxilə etdiyi təsdiqlənmir.

Bildirilir ki, Ağ Evdə mühafizəkar jurnalist Con Solomonun rəhbərlik etdiyi xüsusi işçi qrupu son həftələrdə həmin sənədləri nəzərdən keçirərək Trampın çıxışı öncəsi onların məzmununu qiymətləndirib.