Dünyanın ən isti bölgəsidir -

ABŞ-ın Kaliforniya ştatının şərqində yerləşən Ölüm Vadisi (Death Valley) dünyanın ən sərt iqlimə malik təbii ərazilərindən biri kimi diqqət çəkir.

Metbuat.az bildirir ki, unikal geoloji quruluşu ilə seçilən bu səhra vadisi Şimali Amerikanın ən quraq, ən alçaq və ən isti bölgəsi hesab olunur.

Məlumata görə, vadinin Furnace Creek adlanan hissəsində 1913-cü ildə tarixdə qeydə alınmış ən yüksək hava temperaturu ölçülüb. Həmin gün termometrlər 56,7°C (134°F) temperatur göstərib və bu göstərici bu günə qədər rekord olaraq qalır.

Ölüm Vadisinin daha bir diqqətçəkən nöqtəsi Badwater Basin ərazisidir. Bu ərazi Şimali Amerikada dəniz səviyyəsindən ən aşağı nöqtə hesab olunur və dəniz səviyyəsindən 86 metr aşağıda yerləşir.

Təhlükəli iqlim şəraitinə baxmayaraq, bölgənin sərt və unikal gözəlliyi onu məşhur turizm məkanına çevirib. Hazırda Ölüm Vadisi Milli Parkı Mojave və Colorado səhralarını əhatə edən Biosfer Qoruğunun əsas hissələrindən biridir.