VTB Qrupu “Maliyyə xidmətləri sahəsində ilin ən cəlbedici işəgötürəni” nominasiyasında mükafata layiq görülüb
Bakı, 8 aprel,
AZƏRTACVTB Qrupu nüfuzlu “Randstad Award 2015” reytinqinin “Maliyyə xidmətləri sahəsində ilin ən cəlbedici işəgötürəni” nominasiyasında mükafata layiq görülüb.
“Randstad Award” – öz sahəsində insanların real fikirlərini - bu və ya digər şirkət barədə əslində nə düşündüklərini əks etdirən yeganə mükafatdır. Tədqiqat üç əsas məqama fokuslanıb: brendin tanınması, onun işəgötürən kimi mütləq və müqayisəli cəlbediciliyi.
Rusiyada tədqiqat obyekti ölkə iqtisadiyyatının 15 mühüm sektorundan işçilərinin sayına görə 150 ən iri işəgötürmə şirkəti olub. Onlayn-rəy sorğusunda RF-in 8 federal dairəsindən 9106 respondent iştirak edib. Respondentlər ilk növbədə işəgötürənin seçiminin əsas meyarlarının vacibliyini qiymətləndirib, habelə əlavə suallara cavab veriblər. Bu suallar əmək bazarında davranış və üstünlüklər, planlar və işdəyişmənin səbəbləri, cari işəgötürənlə əməkdaşlığın davam etdirilməsinə səbəb olan amillər, işədüzəlmə imkanları barədə informasiya axtarışının müasir kanalları məsələlərinə aid olub.
“VTB Bank (Azərbaycan)” ASC-nin İşçilərin seçilməsi və inkişafı şöbəsinin rəisi Asiya Haqverdiyeva deyib: “Biz çox şadıq ki, VTB brendinə belə münasibət və etimad var. Məlum olduğu kimi, “VTB Bank (Azərbaycan)” ASC VTB Qrupunun tərkib hissəsidir və brendə maraq Azərbaycanda da müşahidə edilir. Bankımızda peşəkar kadrların hazırlanması, onların ixtisasının artırılması üçün hər cür şərait yaradılıb. Biz getdikcə daha çox gənc mütəxəssisin VTB (Azərbaycan) Bankının kollektivinə qoşulmaq istədiyini görürük. Biz hər bir əməkdaşı, onun biliyini, iş təcrübəsini qiymətləndirir, onun fərdi və peşə inkişafı üçün imkanlar yaradırıq”.