Fermerlərin başı dərddə: bunun əti nə olacaq?

İribuynuzlu heyvanlar arasında  zəhərlənmə halları artıb

Heyvanların örüş-otlaq sahələrində kalış və digər zəhərli alaq otları, herbisidlər, mikrob və kif göbələklərinin miqdarı artıq olan kifli ot və yemlərlə qidalandırılması  zəhərlənmələrə səbəb olur. Milli.Az El TV-yə (Region Tv) istinadən xəbər verir ki, belə qidaları  qəbul edərək zəhərlənən  heyvanlarda mərkəzi sinir sistemində dəyişikliklər, timpaniya, daxili orqanların və ürəyin sıxılması halları baş verir  AİM-in baytar təlimatçısı

Qaraş Vəliyev

bildirir ki, bunun qarşısını almaq üçün, zəhərin heyvanın qanına sorulmasını və təsirini  azaltmaq məqsədi ilə onlara bitki yağları içirdilir, venaya sistem formasında  qlükoza, fizioloji məhlul köçürülür və digər tədbirlər həyata keçirilir.

Gizli formada olan xroniki zəhərlənmələr  heyvanlarda məhsuldarlığın aşağı düşməsinə, çəkisinin azalmasına, boğaz heyvanların bala salmasına gətirib çıxarır. Kəskin zəhərlənmələr isə hətta heyvanların ölümünə səbəb olur. AİM-in baytar təlimatçısı Qaraş Vəliyev bildirir ki, zəhərlənmələrin baş verməməsi üçün heyvanların örüşə aparılmazdan öncə quru otla  qidalandırılması vacibdir. Onların yemlənməsində istifadə olunan  qaba və qüvvəli yemlərin saxlanma qaydalarına da xüsusi riayət edilməlidir:

”Fermerlər zavod və ənənəvi yemlərin saxlanma şəraitinə düzgün əməl etsinlər. Yəni onların üstüörtülü olmalıdır, yağış tutmamalıdır, eyni zamanda döşəmə hissəsinə taxta düzülməlidir ki yerdən nəm çəkməsin. Otlar isə dalan altında, ya da üstüörtülü halda saxlanmalıdır ki, yağışla təmasda olmasın”.

Bildirək ki, heyvanların zəhərlənməsinə səbəb olan kif göbələkləri və zəhərləyici mikroblar əsasən açıq şəraitdə, nəmişlikdə saxlanılan yemlərdə  olur.

Milli.Az