Böyük Britaniyanın “bp” şirkəti Venesuelada olan paylarının bir hissəsini “ТНК-bp” şirkətinə satmaq niyyətindədir. Bu barədə PDVSA Venesuela Neft Şirkətinin vitse-prezidenti Evlogio del Pino məlumat verib. Əsasən Petromanaqasdakı yatağların 16,66 faizinin satılması planlaşdırılır. Pinonun sözlərinə görə, səhmlərin qiyməti barədə məlumat verilmir. Bu yataqlarda neft hasilatının ümumi həcmi gün ərzində 130 min barel təşkil edir.

Qeyd edək ki, Meksika körfəzində baş verən neft sızmasından sonra “bp” yaranan borclarını ödəmək üçün səhmlərinin bir hissəsini satmaq qərarına gəlib. Şirkət artıq 4 milyard dollar xərcləyib, lakin bu rəqəmin 33 milyarda çata biləcəyi ehtimal edilir. “bp”nin bu ilin ikinci yarısında əldə etdiyi təmiz gəlir isə 17 milyard dollar təşkil edib.

“Bloomberg”in hesablamalarına görə, şirkətin Venesueladakı səhmlərinin dəyəri təxminən 1 milyard dollar təşkil edir. Ötən həftə "bp" şirkəti ABŞ, Kanada və Misirdəki yataq və zavodlarını 7 milyard dollara satıb.

Oxunub: 30 dəfə
Mənbə: ANS Press