Zəfər Çağlayan: "Viza rejiminin olmasını izah etmək çox çətindir"

Türkiyə və Azərbaycan arasında viza rejiminin aradan qaldırılması bir çox istiqamətlərdə ikitərəfli əlaqələrin inkişafına xidmət edəcək. Bunu Bakıda səfərdə olan Türkiyənin dövlət naziri Zəfər Çağlayan deyib.

“Viza rejiminin ləğv edilməsi mal dövriyyəsi, turizm potensialı və qardaşlıq əlaqələrinin daha da artmasına gətirib çıxaracaq”, - deyə o, jurnalistlərə bildirib.

Nazir qeyd edib ki, Türkiyə və Azərbaycan arasında viza rejiminin ləğv edilməsi məsələsi Türkiyə prezidenti Abdullah Gülün Azərbaycana planlaşdırılan səfəri çərçivəsində müzakirə olunacaq. “Abdullah Gül yaxın vaxtlarda Azərbaycana səfər edəcək və biz çox vacib qərarların qəbul edilməsinin şahidi olacağıq”, - deyə Z.Çağlayan söyləyib. O, Türkiyə ilə Azərbaycan arasında viza rejiminin tezliklə ləğv ediləcəyinə ümidvar olduğunu deyərək qeyd edib ki, viza rejiminin olmasını izah etmək çox çətindir, halbuki Türkiyə dünyanın 62 ölkəsi ilə vizasız rejimə malikdir.

Oxunub: 18 dəfə
Mənbə: ANS Press