Azərbaycanın iqtisadi inkişaf naziri Şahin Mustafayev belə deyib

“Azərbaycan və Türkiyə sahibkarları üçüncü ölkənin iqtisadiyyatına birgə investisiya qoymalıdırlar”. Bu fikirləri Azərbaycanın iqtisadi inkişaf naziri Şahin Mustafayev Bakıda Azərbaycan-Türkiyə biznes-forumunda deyib.

“Hazırkı durumda xaricdə yüzdən artıq Azərbaycan şirkəti fəaliyyət göstərir. Biz hesab edirik ki, Azərbaycanın və Türkiyənin iş adamları üçüncü ölkəyə bir yerdə investisiya qoya bilərlər. Bu, iki ölkə sahibkarları arasında əməkdaşlığın yeni istiqamətidir. Mən hesab edirəm ki, bu istiqamət çox perspektivlidir və effektli olacaq”, deyə Şahin Mustafayev bildirib

Nazirin sözlərinə görə, bu səbəbdən iki ölkənin biznes adamları qarşılıqlı investisiya siyasətini davam etdirməlidirlər. Yəni, azərbaycanlı biznesmenlər Türkiyəyə, türk biznesmenlər isə Azərbaycana investisiya qoymalıdırlar.

Türkiyənin xarici ticarət üzrə dövlət naziri Zəfər Çağlayan öz növbəsində deyib ki, azərbaycanlı və türk iş adamları başlanğıcda qonşu ölkələrə birgə investisiya qoya bilərlər. “Məsələn, bu, Gürcüstan, Qazaxıstan ola bilər. Bu cür investisiyalar başqa ölkələrin də iqtisadiyyatına qoyula bilər”, deyə Zəfər Çağlayan əlavə edib.
Çağlayan Türkiyə ilə Azərbaycanın strateji tərəfdaş olduqlarını bir daha qeyd edib.

Oxunub: 39 dəfə
Mənbə: ANS Press