Teatrda aparılan əsaslı yenidənqurma və təmir–bərpa işləri yekunlaşmaq üzrədir

Azərbaycan Prezidenti İlham Əliyevin müvafiq Sərəncamına əsasən, Azərbaycan Dövlət Akademik Milli Dram Teatrında aparılan əsaslı yenidənqurma və təmir–bərpa işləri yekunlaşmaq üzrədir.
Teatrdan bildiriblər ki, bu sənət məbədi yeni mövsüm ərəfəsində öz qapılarını teatrsevərlərin üzünə açacaq.

Yenidənqurma və təmir-bərpa işlərinə 2008-ci ilin noyabrında başlanılan Akademik Milli Dram Teatrının binasının 5 min kvadratmetrlik fasad hissəsinə yeni üzlük vurulub, dam örtüyü dəyişdirilib.

Teatr binasının ətrafına hasar çəkilib, dekorasiyaların daşınması üçün xüsusi keçid tikilib. Təmir və yenidənqurma zamanı əvvəlki memarlıq üslubunun qorunub saxlanılmasına və milli ornamentlərlə daha da zənginləşdirilməsinə xüsusi diqqət yetirilib. Fasadın kürsü hissəsi də şəbəkəli dizayn əsasında yenidən bərpa edilib. Azərbaycanın 6 məşhur dramaturqunun büstləri bərpa olunaraq yenidən fasadın görməli yerində qoyulub.

Foyedəki tağlar və tavandakı milli naxış və ornamentlər burada çalışan bərpaçıların yüksək bədii zövqündən soraq verir. Teatrın səs-akustika və səhnə-işıqlandırma sistemləri də müasir layihə və texnologiyalar əsasında yenidən qurulur.

Teatrda bərpa və yenidənqurma işlərini “Sanur” şirkətinin mütəxəssisləri həyata keçirirlər.
Artıq teatrın zallarında, rəssam otağında, lojada və yardımçı otaqlarda işlər tam başa çatdırılıb. Binanın arxasında hər biri 200 kubmetrlik 2 su anbarı inşa olunub. Teatrın ərazisində Şərq memarlığı üslubunda tağvarı yeni giriş qapısı və hər cür şəraiti olan qonaq otağı tikilib.

Layihəyə uyğun olaraq, teatrın ətraf ərazisində də geniş abadlıq işləri aparılır.
Teatrın binası əsaslı təmirdən sonra yeni mövsümdə tam müasir standartlara cavab verəcək şəkildə teatrsevərlərə təqdim olunacaq.

Oxunub: 62 dəfə
Mənbə: ANS Press