Çirkab suların torpaq qatına, oradan da dənizə axdığı məlum olub

Ekologiya və Təbii Sərvətlər Nazirliyi çimərliklərdə məişət tullantılarının idarə edilməsi ilə bağlı reydlərə başlayıb. Daxili İşlər Nazirliyinin əməkdaşları ilə birgə aparılan reydə Novxanı çimərliklərindən start verilib. Məqsəd dənizkənarı kafe və restoranlarda tullantıların ətrafa və dənizə atılmasının qarşısını almaqdır.

Ekologiya və Təbii Sərvətlər Nazirliyinin əməkdaşlarının baxış keçirdiyi obyektlərin əksəriyyətində məlum oldu ki, onların nəinki məişət tullantılarının daşınması barədə müqavilələri, heç doğru-dürüst sənədləri yoxdur. Mövsüm boyu toplanan tullantıları ətrafa yaymaqla Xəzər sahili əməlli-başlı zibil poliqonuna çevrilib.

Çimərlikdə yerləşən kafenin sahibi məişət tullantılarına dair tələb olunan lazımi sənədləri ortaya çıxara bilmədi. Zibili elə ətrafa tullmaqla işini bitmiş hesab edən kafe sahibi bunu özünəməxsus şəkildə əsaslandırdı. Kafe sahibinin sözlərinə görə, bütün günahlar adiyyati orqanlarındır. Çünki o, müqavilə bağlamağa rəsmi şəxs tapa bilmir.

Məsələ ilə əlaqədar hadisə yerinə gələn Sumqayıt şəhər Təmizlik Departamentinin rəsmisi Becam Məmişov bildirdi ki, onlar həmin obyektlərə dəfələrlə xəbərdarlıq edib. Amma heç kim müqavilə bağlamaq istəməyib.

Ekologiya və Təbii Sərvətlər Nazirliynin əməkdaşı isə bildirdi ki, həmin obyektlərin sənədi olmadığından onları yerində cərimələmək, yaxud protokol tərtib etmək mümkün deyil. Ona görə də, onlara qarşı lazımi tədbirlərin görülməsi bilavasitə polisə həvalə olunur.

Bundan əlavə Ekologiya və Təbii Sərvətlər Nazirliyinin əməkdaşı Rəfael Quliyev dənizkənarı ərazilərin çirklənməsində bəldiyyə və digər aidiyyatı qurumları da laqeydlikdə qınadı. Nazirlik əməkdaşlarının qarşısına ürəklə çıxan kafe sahibi ətrafa zibil atmadıqlarını və məişət tullantarını daşımaq üçün müqavilələrinin olduğunu bildirdi. Amma sənədə baxanda məlum oldu ki, burada yalnız çirkab suların axıdılması nəzərdə tutulub. Zibil isə hasarın çölündə qalaqlanıb.

Əvvəlcə özünü obyektin sahibi kimi təqdim edən bu şəxs vəziyyətin heç də onun xeyrinə olmadığını görüb, özünü adi vətəndaş kimi təqdim etməyə çalışdı. Hər cəhdlə nazirlik əməkdaşlarını protokol yazmaqdan çəkindirməyə çalışırdı. Adını söyləməyən həmin şəxs öz işini bir az da çətinə saldı. Polis nədənsə şübhələnərək, əvvəl özünü kafe sahibi kimi təqdim edən şəxsi bölməyə aparmağa qərar verdi.

Xəzər isə öz zibillikləri ilə birgə dalğalanırdı. Dəniz sahilini bir qədər gəzmək yetər ki, buradakı biabırçılıqları və antisanitariyanı görəsən. Elə reyd zamanı aydın oldu ki, burada fəaliyyət göstərən obyektlərin hamısında çirkab sular şambolara (torpaq qatına) axıdılır. Buradan isə həmin çirkabın dənizə sızmamasına heç kim zəmanət vermir. Birbaşa dənizə gedən boru yaxınlıqdakı obyektlərin və yaşayış evlərinin kanalizasiya sularını Xəzərə axıdır. Ekologiya və Təbii Sərvətlər Nazirliyinin sektor müdiri Asəf Bayramov su təmizləyici qurğunun işə düşməsi ilə bu problemin həll olunacağını bildirdi.

Əslində Xəzərin təmizliyi üçün həm rəsmi qurumlar, həm sahibkarlar, həm də, adi vətəndaşlar əlindən gələni etməlidir. İstənilən halda Xəzər sahilinin zibilliyə çevrilməsi də, çirkab suların birbaşa dənizə axıdılması da bizim ziyanımızadır. Sağlamlığını və gələcəyini düşünən millət təmizliyinə də fikir verməlidir.

Oxunub: 22 dəfə
Mənbə: ANS Press