Azərbaycan Rabitə və İnformasiya Texnologiyaları Nazirliyi “Aztelekom” İstehsalat Birliyinin sabit telefon şəbəkəsi abonentlərinə göstərilən 107 servis xidmətinin imkanları genişləndirilib.

RİTN mətbuat xidmətinin rəhbəri Müşfiq Əmirovun verdiyi məlumata görə, xidmət çərçivəsində SMS servisi istifadəyə verilib və bu, sabit telefon şəbəkəsi abonentlərinə mobil telefon şəbəkəsi abonentlərinə SMS göndərmək imkanı təqdim edir.

Xidmət “Aztelekom”un İKT üzrə baş mütəxəssisi Rasim Əliyev tərəfindən yaradılıb və ilk dəfə olaraq PSTN şəbəkəsində istifadəyə verilməklə müştəri-server proqram təminatı paketi və “GSM Gateway” əsasında təqdim edilir. Xidmətdən istifadə etmək üçün abonent “107” sifarişli xidmət sexinə zəng edib SMS sifariş edir, SMS-in mətnini telefonla diqtə edir və mesajın göndərildiyi telefon nömrəsini bildirir.

Qeyd edək ki, abonentlər göndəriləcək SMS-ləri qabaqcadan da sifariş edə bilərlər. Bu isə bayram günlərində abonent əvvəlcədən sifariş verməklə bayram saatlarını rahat keçirdiyi zamanda “107” xidməti onun SMS-lərinin lazımi ünvana çatdırılmasını həyata keçirir.

Artıq “Aztelekom”la mobil şəbəkə operatorları arasında SMS mübadiləsi ilə bağlı müvafiq müqavilələr imzalanıb və sabit şəbəkə abonentləri mobil şəbəkə abonentlərindən fərqli olaraq, SMS-lə keçirilən müxtəlif müsabiqələrin hər birində səs vermək hüququ qazanırlar. Xidmətin daha bir üstünlüyü, mobil şəbəkə abonentlərindən fərqli olaraq sabit telefon abonenti bir dəfəyə istənilən miqdarda SMS göndərmək imkanına malikdir.

Xidmətin tətbiqinə 2 min manat investisiya qoyulub, lakin xidmət sifarişinin ümumi həcmi təxminən 100 min manat təşkil edib. “107” SMS xidmətinin TV şoularda gündəlik reklamı “107” xidməti vasitəsilə beynəlxalq və şəhərlərarası danışıq sifarişinin artımına öz müsbət təsirini göstərib.

Oxunub: 221 dəfə
Mənbə: APA