Şəbəkə avadanlığı istehsalçısı “Cisco Systems” şirkəti dünya internet trafikinin 2014-cü ilə kimi dörd dəfə artacağını gözləyir.

Şirkətin nümayəndələri bunu getdikcə daha çox insanın videoya baxmaq və dostlarla ünsiyyət saxlamaq üçün məhz qlobal şəbəkədən istifadə etməyə üstünlük verməsinə görə proqnozlaşdırırlar.

“Qazeta.ru”nun məlumatına görə, şirkətin proqnozlarına əsasən, 2014-cü ilə kimi internet-trafik həcmi 767 ekzabaytadək artacaq (1 ekzabayt 1 milyard qiqabayta bərabərdir). Bu zaman trafik artımının əsas hissəsi onlayn-videonun payına düşəcək.

Qeyd edək ki, bu rəqəm əvvəl proqnozlaşdırılan göstəricidən 100 ekzabayt çoxdur. “Cisco”nun hesablamalarına görə, istifadəçilərin 2014-cü ildə yükləyəcəkləri bütün video-informasiyaya baxmaq üçün 72 milyon il vaxt lazımdır.

Oxunub: 313 dəfə
Mənbə: APA